Sat hari bagitu kalo ada waktu na jalan-jalan pi Kupang do. Nae bemo ato ada motor na gonceng bawa mai tua ko maen-mean di Tedy’s situ. We, talalu rame bro! Apalai kalo malam minggu. Manusia ni macam ke semut makarubu ame ni gula. Bemo dong deng bunyi tep pung-pang balari pi datang ko cari penumpang. Toko-toko batingkat yang kitong lia macam ke gardus lapuk batumpuk ni, bajejer rapat mati pung di jalan Siliwangi pu pinggir-pinggir. Ruko yang di pinggir pante ni tagantong sa di atas batu. Bar-baru ni satu bar robo. Kalo su sore bagitu, toko dong su buka ais itu manusia su mulai datang ko balanja. Ada yang deng dia pu mai tua ko bagepe di pante Tedys situ ko lia matahari tenggelam sambil makan jagung bakar. Awe! son omong ma di jalan Siliwangi yang kici ana sa ni manusia tapo’a. Su bagitu ju motor deng oto dong parkir ena’-ena sa di jalan bar bemo dong bajalan pi datang. Bolom lai ko ada orang bajual di trotoar di muka toko dong. Kitong jalan ni mo sili oto ko mo sili manusia?
Kitong lia ame ni manusia deng oto dong tamba lai deng penjual di pinggir jalan situ macam ke kotoran yang mangalir di kali Oeba’.
Mo bilang le? Kitong andia bagitu su. Bar-baru be dengar ju pamerenta Kota Kupang mo reklamasi tu pante dar Tedys sampe Pante Timor. Tau apa tu e? Eh! Ta’ usah pusing deng itu do. Itu pamarenta pu urusan. Ma bagini dong pu cara? Bar-baru sa bap tua Wali Kota ada suru itu orang dong ko bajual di Jalan Garuda ko apa ko. Pokonya yang di situ su. Kalo su sore ni it jalan dong su palang pake ban. Orang dong mulai tola dong pu kareta ba’so ko pi bajual di situ. Bemo yang mo lewat situ musti putar nae lewat jalan kici satu di situ ko tembus di samping gereja Kristus Raja. Ais itu bar lurus turun pi Oeba. Dong palang ni jalan beking kitong jalan mas baputar kiri kanan lai. Co bagitu sa mas bae. Ni sonde, tu jalan belok nae ni talalu sempit sampe beking oto dong basesak di situ. Kadang amper batabrak.
Tartau kanapa e ko tu jalan bisa tutup ko pake bajual di situ. Kitong sama ke su miskin tana sa. Bajual bukannya di pasar ato di dia pu tampa ma pi bajual di jalan lai. Tu jalan aspal kan untuk oto ato motor lewat situ to.
Be heran e! Biasa Pol PePe dong usir orang yang bajual di trotoar ato pinggir jalan karna bilang langgar atoran. Tau-tau pamarenta sandiri yang parenta tutup jalan ko bajual. Su karmana ni? Neu ator sa. Ma ator tu yang enak sa o! Be dengar bilang mo tutup jalan El Tari Satu le yang depan kantor gubernur tu. Karmana na tutup jalan samua su.
Omong-omong tentang jalan ni, be bar inga e. Be deng be pu kawan ko jalan kaki dar Naikoten sampe Tedys situ. Sepanjang jalan ni, be lia orang parkir bagit-bagitu sa di pinggir jalan dong. Su bagitu ada yang beking emper toko ato taro dia pu jualan dong di trotoar situ. Macam ke dia pu nene moyang pu trotoaar sa. Ho, be talalu jengkel e. Trotoar sonde jelas ju. Be sampe piker bilang ni artinya pamarenta sonde hargai kitong yang biasa jalan kaki. Kalo di kota-kota di nagara maju dong tu, su kas pisa oto pu jalan, sapeda pu jalan deng orang jalan kaki pu jalan. Ma di Kupang ni, jangankan trotoar, oto pu jalan sa son batul.
Bosong tanda be pung omong ni e! Barap taon lai jalan yang dar Kuanino sampe jalan Siliwangi ni nanti macam ke got yang sesak deng kotoran. Dia pu macet ni nanti macet yang nyeri mati pung.
Ni masala memang ada jalan kaluar ma kitong urus bajalan sa sampe otak son jalan sampe yang jadi hanya jalan-jalan di tampa sa.
Ha ha ha . . . !!!
Tidak ada komentar:
Posting Komentar