Awe, kitong di eNTeTe ni sakarang ada foe deng pemekaran daera o. Bar-baru ni Sabu-Raijua bar jadi sat kabupaten yang tapisa dar Kabupaten Kupang to. Be baca di korang dong bilang Andonara yang di Flores Timur, Mollo deng Amanatun yang di Timor Tenga Salatan, tamba lai deng Malaka yang di Belu tu ada baomong ko mo beking ame sat kabupaten lai.
Ko kas pica ni daerah banya-banya supaya apa? Be dengar biasa omong to bilang supaya kas deka pamarenta pu pelayanan deng kitong masyarakat. Dan memang batul, slama ni ada masyarakat yang jao dar kantor-kantor pamarenta jadi mo urus apa stenga mati. Yang batul sa o! Jang sampe su jadi kabupaten sandiri ju bukan kas deka pelayanan ma kas deka kantor bupati sa. Yang paling para tu kalo sampe kas mekar ni daerah dong ko hanya mo jadi bupati sa ato dapa jabatan enak. Tau to, orang biasa omong di muka bilang bela kitong orang kici ma di blakang ni ju macam ke ular. Dia cum kejar doi deng jabatan sa untuk dia pu pribadi. Bisa ju karna dia kala waktu pili bupati ko dia bentuk ame sat kabupaten ko dia bis jadi bupati.
Kalo mo beking kabupaten baru, be rasa tolong ko sadar a! Mo beking kabupaten baru supaya apa? It tampa ada apa sa? Dia ada hasil alam ko sonde? Ada orang-orang pintar di situ ko sonde? Pokonya pikir ais mus pikir tamba lai te bahaya tu bro! Jang sampe beking ais it kabupaten ju orang miskin tamba banya’, son ada ruma yang bae untuk kantor-kantor dong, jalan lobang-lobang bar barang yang dijual ko ada APeBeeD. Tarakhir ju it pejabat ato orang pamarenta dong dapa doi ena-ena’ ma kitong orang kici bodo ni stenga mati.
Be kadang ke lucu e, lia ni orang dong foe deng in barang. Dong mekarkan sat eRTe jadi sat desa, sat desa jadi sat kecamatan, sat kecamatan jadi sat kabupaten, sat kabupaten jadi sat propinsi. Kalo be yang ke dong a, untu apa mekarkan bagitu? Sekalian mekarkan jadi propinsi ato paling enak beking satu eRTe jadi negara sendiri sa biar puas dapa jabatan to.
Tidak ada komentar:
Posting Komentar