Co dengar do! Su barap kali a, be deng bemo Oesapa pi Kupang ato dar Kupang bale pi Oesapa. Turun-turun di Pohon Duri situ, yang lewat Pertamina di kilo tuju situ ato di ujung jambatan panjang Oesapa yang ada bok tu, Polisi Lalu Lintas dong ada tilang-tilang motor dong di situ. Dong pu tampa tilang satu di deka kuburan Kelapa Lima situ. Dong tilang ju di bok lai. We, kadang orang yang bawa motor ato ana ojek dong yang lewat situ, kan jalan menurun ato bok to jadi dong son dapa lia polisi dong. Yang bawa motor ni lari kicang-kicang bar bok tidor lai. Kaget bagini ju Lantas su di depan. Kalo son ada surat-surat ato son pake helem, mo lari karmana o. Manyara su ma. Ada doi lim pulu atao dua pul lima bagitu bae, ma kalo son ada na nanti bar pi ame motor di Resta sana. Kalo son ada surat-surat deng SIM ato son pake helem na jalan mus lia-lia te dong biasa tapele di bok na. Jang barani bilang mo lari te dong su pasang memang Lantas sat orang ko buru orang yang lari. Be parna lia itu di waktu dong tilang di Kelapa Lima sana.
Tau kanapa e ko dong paling suka tepa di bok sa? Pasti dong mo tapele to supaya orang yang son ada helem ato SIM na kana tangkap. Batul ko? Bilang sa, ho. Itu namanya jebak orang to? Kola maen tepa di bok tu bahaya o. Orang lari pelor bar bok tidor lai bisa lari nae it Lantas dong yang tilang di situ. Kalo su bagitu, Lantas mo nae di sapa o? Banae su ma karna orang ju bisa bela diri to. Masa’ tilang di bok.
Tidak ada komentar:
Posting Komentar